A escritora Andrea Maceiras visitou o noso centro para falarnos sobre un libro que os rapaces e rapazas de 1º ESO lemos ao longo do primeiro trimestre: O segredo do lagarto arnal.
Comezamos o encontro cunha breve presentación realizada por tres alumnos sobre a autora e as súas obras. A continuación, Andrea Maceiras falounos da súa novela, dos personaxes, da historia... Unha parte moi interesante da charla foi cando xurdiu a temática do acoso, aspecto este moi destacable na obra que a escritora comentou dándolle especial importancia. Fíxonos reflexionar sobre este tema poñendo exemplos moi próximos a nós (Os Simpsons ).
Despois respondeu ás nosas preguntas. Estas foron moi variadas: algunhas sobre a obra en cuestión e outras relacionadas co seu traballo como escritora. Contounos que comezou a escribir cando tiña a nosa idade e animounos a presentar os nosos traballos a concursos literarios. Tamén nos comentou cales eran as súas lecturas preferidas e a importancia que tiña a lectura e a escritura na súa vida.
Finalmente, Andrea visitou a nosa biblioteca e alí concedeunos unha entrevista que publicaremos no blog en breve.
Moitas grazas Andrea polo teu libro, pola túa amabilidade e simpatía e, sobre todo, por compartir este tempo connosco.
No hay comentarios:
Publicar un comentario