Alicia Seoane Freire, alumna de 1º bacharelato, aborda o problema do terrorismo islámico e afonda nas súas causas, achegándonos unha magnífica lección de cordura que cómpre divulgar.
11 de setembro de 2001, New York: 3000
mortos, 9000 feridos. 11 de marzo de 2004, Madrid: 191 falecidos, máis de 1600
afectados. 7 de xullo de 2005, Londres. 7 de xaneiro de 2015, revista
"Charlie Hebdo", Francia. 10 de outubro de 2015, Ankara. 31 de
outubro de 2015, derribo do avión ruso con 224 pasaxeiros: sen sobreviventes.
13 de novembro de 2015, París: 130 vítimas, máis de 350 malferidos. 28 de novembro,
Bamako, ataque contra a base da ONU [...]
Os grupos terroristas cometeron
decenas de atentados que os occidentais traducimos por masacres maquinadas por
mentes enfermas, pero: por que contra nós? Estamos facendo o correcto?
Por exemplo, remontémonos no tempo a
1916. Gran Bretaña e Francia queren rematar co Imperio otomano e saben que tan
só poderán conseguilo dende dentro, co que os convencen para que, movidos polo
desexo dunha Gran Arabia, lles axuden. Co obxectivo conseguido actúan en
consecuencia do acordo Sykes Picot e reparten os territorios de Oriente
Próximo. Europa móvese por intereses puramente económicos e políticos e non
mostra ningún respecto polos territorios cos que trata.
Máis aínda. En 2003 unha coalición
formada por EEUU, Reino Unido, Australia, España e Polonia invade Irak co falso
pretexto da súa posesión de armas de destrución masiva. O verdadeiro desexo era
irromper alí para rematar co réxime de Sadam Husein, ditador iraquí por aquel
entón. Visto deste modo somos uns heroes, uns buscadores da xustiza, pero hai
máis. Non debemos crer cegamente no que se nos conta. É lóxica tal pretensión
estando as mesmas potencias hoxe en día aliadas con ditaduras semellantes? Por
que Irak? A resposta é sinxela. Recursos que traducimos en diñeiro.
O ex-ministro británico Blair pensa
agora que posiblemente a guerra de Irak foi unha das causas do ascenso do
Estado Islámico. - Non se pode dicir que os que derrocamos a Sadam en 2003 non
teñamos responsabilidade pola situación no 2015 – engadiu – aínda que non foi
un erro derrocar a Sadam.
El mesmo repara no que comentamos
anteriormente. Sadam non era o gobernador que unha nación pretende, pero os
interventores non actuaron todo o ben que debían, fundamentalmente porque a
motivación non era humanitaria, senón económica.
Atopámonos agora ante unha situación
semellante. Siria pode estar sendo bombardeada mentres ti estás lendo isto
tranquilamente. Pensa na cantidade de persoas que, "sen comelo nin
bebelo", desgraciadamente naceron "no lugar equivocado". Coa
desculpa de rematar co terrorismo do Estado Islámico, millóns de persoas vense
afectadas. Se á indignación que deben de estar sufrindo sumamos a falta de
cultura e o sometemento relixioso que padecen, podemos facernos unha idea da
orixe de todos eses ataques que acaban
en catástrofe.
Pero non nos afastemos máis do tema...
Se o que realmente pretendemos é acabar con ese tipo de réximes políticos, e
sabemos que en consecuencia estamos causando danos persoais, deberiamos amparar
aos que os sofren. Desafortunadamente, volvemos a non estar facendo o que nos
corresponde. Os países europeos non se mostran moi dispostos á acollida de
refuxiados sirios que foxen do horror e a barbarie; é máis, o propio ministro francés Manuel Valls asegurou que "non podemos aceptar máis refuxiados en Europa, iso non é
posible". A cidadanía involucrouse integramente
con París e pretenden deixar de lado aos sirios e non facer nada por eles, e
encima bombardéanos? Paréceme sumamente inxusto. Onde están os Dereitos
Humanos? Onde están as persoas humanas? Non é sequera suficiente a aparición
nunha praia dun pequeno de 3 anos que afogou mentres tentaba buscar un mundo
mellor que lle dera acubillo?
" Pensaron
que coas súas balas nos calarían para sempre, pero fracasaron. Dese silencio
xurdiron miles de voces. [...] Teño dereito á educación, [...] a que se escoite
a miña voz". As palabras pronunciadas por Malala Yousafzai, premio Nobel
da Paz 2012 poden axudarche a reflexionar. Termínase a guerra con guerra?
Debemos apoiar
e axudar a aqueles que non poden solucionar os seus problemas de maneira
autónoma pero non con armas e intereses económicos polo medio,
senón con palabras e sen ánimo de lucro.
De acordo con Gandhi " Opóñome á violencia, porque
cando parece causar o ben este só é temporal, o mal que causa é permanente"
.
Alicia Seoane Freire, novembro de 2015
No hay comentarios:
Publicar un comentario