Feiras en Curtis

Inaugurada a estación de Curtis (1 de setembro 1883), o crecemento do núcleo urbano é moi rápido ao ser moitas as persoas da comarca que ven na nova poboación posibilidades de futuro. Fondas, almacéns, serradoiros... vanse establecendo ao largo da estrada da nova localidade.

En abril de 1894 a corporación municipal (sita en Santaia) coroa este proceso coa creación dunha feira pública de gando de todas as clases,  grans, queixos,  ovos, legumes e artigos de primeira necesidade, concretamente “donde se halla enclavada la estación de Curtis, punto de arranque de diferentes vías de comunicación”. Celebrarase o 23 de cada mes e bota a andar en xuño de 1984, pero, dado o éxito obtido, amplíase ao 9 de cada mes.

A partir deste momento, as feiras convértense, xunto coa estación, no motor da economía local. Existe constancia de que nos días de feira se podían contar máis de 60 autobuses estacionados ao largo da rúa principal procedentes de toda Galicia. Bares e fondas están ao completo dende a véspera e a partir da madrugada o tráfico de persoas e mercadorías é impresionante.

A carballeira está ateigada de xente, de gando e das máis variadas mercadorías. As transaccións económicas son constantes e a vila vive un dos períodos máis doces da súa historia. No recinto feiral ou na estrada tamén teñen cabida o cantador de coplas co seu desafinado violín, a sorte do paxaro, a menciñeira, os charlatáns, a adiviña, os pillos e os mutilados.

Chegado o anoitecer, o ritmo decae e comeza o paseo das mozas que previamente mudaron de roupa para acudir ao baile nunha das salas da vila.

Abonda un só dato para dar idea do gran volume de compra- venda  que se realizaba na feira de Curtis: máis de 70 vagóns saen cada 15 da estación cargados de becerros para os matadoiros de Madrid e Barcelona ou con mulas e cabalos destinados a labrar os campos de Castela. 

ANDRÉS MARIÑO SANMARTIN, HISTORIADOR LOCAL