Carta coa que Vituco Neira se despide da súa audiencia en Facebook
PLANETA FURANCHO
Querid@s
furancheiros e furancheiras, todo ten un principio e todo ten un final e
a última emisión do Planeta Furancho vai ser o venres 29 deste mes das
letras. Dende a Radio Galega comunicáronos que dende ese día prescinden
do noso traballo.
Foron 1400 noites compartindo con vós a
mellor música do mundo e perdemos a conta da xente que se pasou polo
programa a falarnos dos seus proxectos, das súas músicas e das súas
cousas. Das veces que tivemos música en directo nos nosos estudios. Dos
programas especiais que fixemos dende colexios, institutos, festivais,
salas de concertos e demais sitios ós que acudimos coa nosa unidade de
exteriores.
Tentamos con todo o noso corazón tratar co máximo
respecto a todos @s músico@s deste país ben fosen propostas consolidadas
no panorama ou grupos que estaban comenzando a súa andaina pola escena e
sempre dentro da nosa idea de dar difusión ás músicas que empregan o
galego no seu proxecto. A razón da existencia do furancho foi dar
difusión e servir de altofalante da escena da música cantada en galego.
Vivimos momentos ben fermosos ó longo destes anos e tivemos a sorte de
traballar cun equipo técnico e humano de auténtico luxo. Técnic@s,
técnic@s de exteriores, coordinadores, colaborador@s e compañeir@s da
radio que sempre nos apoiaron e viviron intensamente con nós esta
ilusión que se viraba realidade cada noite cando comezaba a soar a
“festa criminal” dos Galegoz, a mellor sintonía posible para esta
aventura radiofónica.
Non somos nós moito de réquiems nin de
ir a enterros así que imos rematando esta nota desexándovos moita
alegría, moita vida e moita música.
O noso agradecemento máis
sentido a tod@s @s músic@s que nos encheron de argumentos cada noite coa
súa música, a súa palabra e o seu traballo. O mérito foi todo deles.
E por suposto grazas a tod@s @s que estivestes aí do outro lado do
aparato de radio facéndolle tanto caso ás nosas músicas e ós nosos
músicos e compartindo con nós toda esa enerxía positiva que tanto nos
alimentou entrando de volta polas antenas do noso falcón milenario
particular cada noite do ano.
Non sabemos se algún día
voltaremos a estar en órbita pero confiamos en que nos botedes un pouco
de menos e en que continuedes sintonizando co traballo excepcional e
fascinante que están, e sempre estarán, a facer @s músic@s desta terra.
Orgullo de país.
Saúde e ata a próxima.
V. Neira
No hay comentarios:
Publicar un comentario